![Event: Sinemaes at National Eisteddfod of Wales Venue: Cardiff BayDate: Saturday 4th August 2018 – Saturday 11th August 2018](https://www.bafta.org/sites/default/files/styles/news_main/public/externals/06018f8c86c0258bd5007f12e1e6fcb9.jpg?itok=hqNKD90G)
41 digwyddiad a 45 o siaradwyr yn ymgynnull i ddathlu dros wyth diwrnod
Yr uchafbwyntiau’n cynnwys digwyddiad yng nghwmni Rhys Ifans
Mae BAFTA Cymru’n dathlu diwedd trydedd flwyddyn lwyddiannus o’r bron yn cynnal dathliad o ffilm a theledu o Gymru mewn sinema mewn tipi yn Eisteddfod Genedlaethol Caerdydd 2018.
Bu 3, 300 o bobl yn mwynhau’r rhaglen yn Sinemaes, sef 36% yn fwy na llynedd. Cynhaliwyd digwyddiadau yng Nghanolfan Mileniwm Cymru a’r Eglwys Norwyaidd yn ogystal â’r tipi.
“Yn sgil llwyddiant digwyddiadau blaenorol ac oherwydd bod y diddordeb y niferoedd yn uwch na allai’r gofod ei ddal, mi fuon ni’n cydweithio â’r Eisteddfod i adleoli ambell ddigwyddiad i leoliadau eraill gerllaw,” meddai Hannah Raybould yn BAFTA Cymru.
“Cynhaliwyd tri dangosiad mawr yn yr Eglwys Norwyaidd - premiere byd-eang Anorac, rhaglen ddogfen gerddoriaeth newydd gan Huw Stephens, rhagddangosiad o bennod o gyfres newydd Byw Celwydd, enwebai BAFTA Cymru, er cof am yr awdur Meic Povey, a fu farw yn gynharach eleni, a dangosiad o ffilm animeiddio hynaf y DU, Jerry the Tyke, a wnaethpwyd gan dafluniwr o Gaerdydd i Pathé yn y 1920au gyda sgôr fyw gan Arad Goch.”
Ymhlith uchafbwyntiau eraill yr wythnos, roedd sesiwn holi ac ateb gyda Rhys Ifans gan Into Film Cymru, cyflwyno gwobr arbennig i’r darlledwr o fri Euryn Ogwen Williams, dangosiadau gorlawn o glasur o’r 80au, SuperTed, a dangosiadau dyddiol o gasgliad newydd o ffilmiau o’r archif ar daith drwy drefi a dinasoedd Cymru o’r 1920au i’r 1990au.
Prif thema Sinemaes eleni oedd talent newydd, a chafodd y gynulleidfa gyfle i ddarganfod talent newydd o Gymru ar y sgrin drwy gyfrwng cyfres o ffilmiau byrion, gan gynnwys rhai a wnaethpwyd gan fyfyrwyr mewn prifysgolion yng Nghymru drwy gynllun ‘It’s My Shout’, ffilmiau a ddaeth i’r brig yng ngŵyl PICS, gan ddangos doniau creadigol plant ysgol, a mwy.
Mi gynhaliwyd nifer o sesiynau trafod yn ystod yr wythnos hefyd. Bu un panel yn trafod comedi ar y teledu, un arall yn asesu ‘oes aur’ gyfredol drama deledu yng Nghymru, ac un arall yn archwilio datblygu archif ehangach gan y BBC yng Nghymru. Cynhaliwyd digwyddiadau hefyd i ddathlu gwaith a bywyd yr actores Iola Gregory, y cyfarwyddwr a’r cynhyrchydd Richard ‘Dic’ Lewis, a dangosiad ugainmlwyddiant o’r ffilm Porc Pei er cof am Trefor Selway. Un trafodaeth pobolgaidd iawn oedd cyn rhag-ddangosiad o bennod nesaf Pobol y Cwm, yng nghwmni rhai o brif actorion y gyfes sebon.
Daeth Sinemaes i fod fel dathliad blynyddol o waddol Cymru ar y sgrin, yn ogystal â meithrin diddordeb mewn gyrfaoedd yn niwydiant y cyfryngau creadigol. Eleni, byddwn ni’n cloi’r wythnos gyda sesiwn holi ac ateb arbennig iawn gyda’r cyfarwyddwr Marc Evans, enillydd nifer fawr o wobrau BAFTA Cymru.