A Mechanical Story yn ennill Gwobr BAFTA Cymru ar gyfer Gemau a Phrofiad Rhyngweithiol

19 June 2015

Heddiw, cyhoeddodd yr Academi Brydeinig Celfyddydau Ffilm a Theledu yng Nghymru, sef BAFTA Cymru, mai A Mechanical Story sydd wedi ennill Gwobr yr Academi Brydeinig yng Nghymru 2015 ar gyfer Gemau a Phrofiad Rhyngweithiol. Arweinydd y seremoni, a gynhaliwyd yn Neuadd y Ddinas Caerdydd, oedd y comedïwr a’r darlledwr o Gymru, Chris Corcoran.

Mae A Mechanical Story, gan Skyfish Studios Ltd, yn gêm pos heriol, seiliedig ar ffiseg, lle mae teclynnau mecanyddol yn cyfarfod â chwarae amser real, ac mae’n rhaid i chwaraewyr ddatrys pos yn gywir trwy adeiladu teclynnau sy’n gweithio ar draws 48 o lefelau a saernïwyd yn ofalus. Sefydlwyd Skyfish Studios Ltd ym mis Mehefin 2014 gan Mel Wah, Lucy White-Lewis ac Yucel Karamanli, ac A Mechanical Story yw eu cydweithrediad cyntaf.

Llwyddodd y gêm i guro cystadleuaeth gan The Doctor and the Dalek (BBC Cymru Wales Ar-lein a Dysgu / Somethin’ Else) ac Infinity Runner (Wales Interactive) i ennill y wobr.

Cyflwynwyd cymeradwyaeth i gydnabod rhagoriaeth mewn pedwar categori hefyd:

enillydd Cymeradwyaeth ar gyfer Cyflawniad Artistig oedd Madron (Cube / Glasshead / S4C); dyfarnwyd Cymeradwyaeth ar gyfer Dyluniad Chwarae i Thud Media am Boj Digs, a gymeradwywyd yn y categori Sain a Cherddoriaeth hefyd, am Toot’s Harbour; ac enillydd Cymeradwyaeth ar gyfer Cyflawniad Technegol oedd Prosiect Rhith-wirionedd Nielson 360 gan Atticus Digital Ltd.

Dywedodd Rebecca Hardy, Rheolwr Gwobrau BAFTA Cymru: “Mae enwebeion ac enillwyr eleni yn amlygu’r sector gemau dawnus, ac yn adlewyrchu cryfder a thwf y diwydiant cyffrous hwn yng Nghymru.”

Sefydlwyd Gwobr yr Academi Brydeinig yng Nghymru ar gyfer Gemau a Phrofiad Rhyngweithiol yn 2013, ac mae’n cydnabod, anrhydeddu a gwobrwyo unigolion am gyflawniad creadigol eithriadol yn eu maes.

Mae’r seremoni wobrwyo ar gyfer Gemau a Phrofiad Rhyngweithiol yn un o uchafbwyntiau Sioe Datblygu Gemau Cymru, sef digwyddiad uchel ei barch y diwydiant creadigol sy’n denu oddeutu 500 o bobl o’r diwydiant a phobl sy’n frwd dros gemau bob blwyddyn.

Cynhaliwyd parti cyntaf BAFTA Cymru i enwebeion y Wobr Gemau a Phrofiad Rhyngweithiol ar 5 Mehefin, yn y Doctor Who Experience ym Mae Caerdydd.

Caiff Gwobr yr Academi Brydeinig yng Nghymru ar gyfer Gemau a Phrofiad Rhyngweithiol ei noddi gan Brifysgol Glyndŵr, Ymgyrch .cymru .wales, Just Perfect Catering, First Great Western, Ethos, Sioe Datblygu Gemau Cymru, Grolsch, Mint Motion, Gorilla ac Elin Rees PR.